Að meðaltali voru 375 manns á biðlista eftir hjúkrunarrými á öðrum fjórðungi ársins, samkvæmt upplýsingum frá embætti landlæknis.
Fram kemur á heimasíðu embættisins að biðlisti hafi lengst umtalsvert frá árinu 2014 og náð hámarki í lok árs 2018 en heldur styst það sem af sé ári. Einkum fjölgaði í hópi þeirra sem höfðu beðið lengur en 90 daga á tilgreindum tímapunktum.
Í yfirliti landlæknisembættisins kemur fram að flestum rýmum hafi verið úthlutað á fyrsta ársfjórðungi hvers árs.
Á fyrsta ársfjórðungi ársins 2019 fengu 273 einstaklingar hjúkrunarrými, fleiri en árin á undan. Af þeim biðu ríflega 50% lengur en 90 daga. Það hlutfall var innan við 20% á sama tímabili ársins 2014 og fór í fyrsta skipti yfir 50% á fyrsta ársfjórðungi ársins 2019. Lítil fjölgun varð á hjúkrunarrýmum á landsvísu á síðustu 10 árum, að því er fram kemur í Morgunblaðinu í dag.