Einhyrningur braut ökkla á leið úr rúmi

„Ég hitti eina sem var að fara í fjögurra ára skoðun í næstu viku og vildi að bangsinn sinn fengi fjögurra ára skoðun líka, svo hún vissi hvað í því fælist,“ segir Brynhildur K. Ásgeirsdóttir, læknanemi og einn stjórnarmanna í lýðheilsufélagi læknanema, í samtali við mbl.is um bangsaspítalann svokallaða, sem var haldinn í dag.

Þessi unga dama kom með tvö tuskudýr, mýsnar Mikka og Minnu, og fór yfir það með lækninum hvað amaði að. mbl.is/Hari

Á bangsaspítalanum fá sjúkir og slasaðir bangsar og tuskudýr aðhlynningu en verkefnið er árlegt og er hluti af námi læknanema á fyrsta ári, sem taka á móti böngsunum og umráðamönnum þeirra, börnunum. Er þetta fyrst og fremst gert til að kynna börnum heilbrigðisþjónustu en einnig til að læknanemar fái tækifæri á að spreyta sig í sloppnum. 

Frétt af mbl.is

Bangsar í lífshættu undir hendur læknanema

Bangsaspítalinn var til húsa á heilsugæslustöðvunum Efstaleiti, Höfða og Sólvangi, og sagði Brynhildur að líklega hefðu um fimmtíu komið í heimsókn í Efstaleiti, þar sem hún var. „Við tókum okkur bara góðan tíma í þetta. Það er í raun farið yfir allt hjá bangsanum og hann settur í röntgentæki og hitt og þetta skoðað. Kvillarnir sem bangsarnir þjáðust af voru allt frá magapínu upp í ofnæmi fyrir ljósastaurum,“ segir Brynhildur, og segir að þrátt fyrir óvenjulega kvilla hafi verið unnt að lækna allt.

Bangsalæknir spyr umráðamann hvað hrjái tígurinn. mbl.is/Hari

Vissara að fara með Einar til læknis

Lilja Karen Sigurðardóttir, þriggja ára, er ein þeirra ábyrgu bangsaumráðamanna sem fóru með slasað tuskudýr sitt á bangsaspítalann í dag. Bangsinn, einhyrningurinn Einar Áskell, hafði að Lilju sögn fallið úr rúminu um morguninn og slasað á sér fótinn. Virtist meinið í fyrstu ekki mjög alvarlegt, líklega vægur áverki á innanverðu ökklabeini (l. medial talus) gat faðir Lilju sér um, en sá er íþrótta- og heilsufræðingur að mennt. Þótti Lilju vissara að fara með Einar á spítalann og fór móðir Lilju, Sigrún Halldórsdóttir, með Lilju og Einar Áskel beinustu leið upp í Efstaleiti.

Lilja Karen og Einar Áskell kampakát með þjónustuna á bangsaspítalanum. Ljósmynd/Sigrún Halldórsdóttir

Segir Sigrún að þar hafi verið tekið á móti þeim Lilju og Einari þar sem þau fengu samtal við lækni og fóru í sameiningu yfir atvik málsins. Því næst var farið inn á læknastofu þar sem Einar var settur í röntgenmyndatöku. Í ljós kom að áverkinn á fæti hans var ekki jafn vægur og faðir Lilju hafði talið, beinið var brotið. Fékk Lilja þá að velja lit á sárabindi og plástur, og fékk svo leiðbeiningar frá lækninum um hvernig skyldi hlúa að Einari næstu daga: Knúsa fjórum sinnum á dag, borða hollt og taka það rólega.

Frá bangsaspítalanum í dag. mbl.is/Hari

• Blogga um frétt