Biðlistar eftir hjúkrunarrýmum hafa styst

Svandís Svavarsdóttir heilbrigðisráðherra hefur sett á áætlun framkvæmdir við gagngerar endurbætur á hjúkrunarheimilunum á Patreksfirði, Ísafirði, í Neskaupstað og í Hveragerði þar sem brýnt er orðið að bæta aðstæður og aðbúnað íbúa. Þá hefur fjölgun hjúkrunarrýma á höfuðborgarsvæðinu leitt til þess að biðlistar hafa styst.

Þetta kemur fram í tilkynningu á vef Stjórnarráðs Íslands.  

Heilbrigðisráðherra kynnti í apríl 2018 áætlun um stórátak í uppbyggingu hjúkrunarrýma á landsvísu til ársins 2023. Áætlunin fól í sér endurskoðun á eldri áætlun með auknu framkvæmdafé upp á 10,5 milljarða króna og þar með getu til að ráðst í framkvæmdir við rúmlega 300 hjúkrunarrými til viðbótar.

Áætlunin sem ráðherra kynnti tók því til uppbyggingar og endurbóta á tæplega 800 hjúkrunarrýmum til ársins 2023. Á meðfylgjandi mynd sést staða framkvæmda við uppbyggingu hjúkrunarheimila samkvæmt framkvæmdaáætlun til ársins 2023, auk þess sem bætt hefur verið inn í áætlunina með framlengingu hennar til ársins 2024.

Tímabundinn rekstur hefst á gamla Sólvangi í október

Samkvæmt nýrri samantekt Embættis landlæknis hefur fjölgun hjúkrunarrýma á höfuðborgarsvæðinu þegar leitt til þess að biðlistar hafa styst.

Þess má vænta að biðlistar styttist enn frekar þegar tímabundinn rekstur 38 hjúkrunarrýma hefst á gamla Sólvangi í Hafnarfirði 1. október. Þau hjúkrunarrými verða í rekstri þangað til að hjúkrunarheimilið við Sléttuveg í Reykjavík verður tekið í notkun.

Í samræmi við uppbyggingu hjúkrunarrýma er í fjárlagafrumvarpi næsta árs er gert ráð fyrir að auka framlög til uppbyggingar hjúkrunarrýma um 1,8 milljarð króna á næsta ári. Aukin framlög til reksturs hjúkrunarrýma sem leiðir af fjölgun þeirra nemur 1,9 milljörðum króna.

Staða framkvæmda við uppbyggingu hjúkrunarheimila samkvæmt framkvæmdaáætlun. Ljósmynd/Stjórnarráðið

• Blogga um frétt