Alls konar rusli er hent úti á víðavangi

Ófögur sjón blasti við augum við Rauðavatnið, en í kringum það er mikil náttúrufegurð og vinsælt útivistarsvæði fyrir göngufólk og hestamenn. Einhver hafði farið þangað og losað sig við alls konar drasl.

Bjarni Brynjólfsson, upplýsingastjóri Reykjavíkurborgar, segir að rekist fólk á drasl á víðavangi í borgarlandinu eigi það að senda ábendingu um það á heimasíðu borgarinnar. Starfsmenn borgarinnar muni þá hreinsa til. Hann segir nokkuð algengt að tilkynningar berist um að drasli sé hent á víðavangi.

Bjarni hafði heyrt að á samfélagsmiðlum væri boðið upp á að losa fólk við drasl gegn vægu gjaldi. Í stað þess að fara með það í Sorpu hefði því verið hent úti í náttúrunni.

„Það er algjörlega forkastanlegt að á 21. öldinni sé fólk enn að fleygja svona á víðavangi,“ segir Bjarni í Morgunblaðinu í dag.