Fæðingum á Landspítala fjölgar

Fæðingum á Landspítalanum á tímabilinu janúar til september í ár fjölgaði um 4,8% miðað við sömu mánuði í fyrra. Þetta kemur fram í skýslu um starfsemi sjúkrahússins í septembermánuði síðastliðnum, þar sem reksturinn er greindur út frá ýmsum viðmiðum.

Alls fæddust 2.466 börn á Landspítalanum á umræddu tímabili í ár en 2.317 árið 2018. Tvíburafæðingar á sjúkrahúsinu á fyrstu níu mánuðum líðandi árs voru 52 en 38 þegar sama tímaskeið á síðasta ári er haft sem viðmið.

„Skýringarnar á þessari fjölgun geta verið tvíþættar,“ segir Hulda Hjartadóttir, yfirlæknir fæðingardeildar Landspítalans, í samtali við Morgunblaðið. „Annars vegar að fæðningartíðni sé meiri og hins vegar að fleiri konur velji að fæða á Landspítalanum fremur en á sjúkrahúsum úti á landi. Hver skýringin nákvæmlega er sjáum við ekki fyrr en árið allt er gert upp.“