Verk eftir gamla meistara boðin upp

Þrjú málverk eftir Jóhannes Kjarval, eitt eftir Gunnlaug Scheving og eitt eftir Ásgrím Jónsson eru meðal verka sem boðin verða upp á vegum uppboðshússins Bruun Rasmussen í Kaupmannahöfn í næstu viku.

Verkin, sem koma úr einkasöfnum, hafa vakið athygli meðal íslenska málverkasafnara sem vita ekki til þess að þau hafi verið sýnd hér á landi eða um þau fjallað í bókum um listamennina.

Þá þykja verkin nokkuð hátt verðlögð. Svínahraun, landslagsmynd eftir Kjarval, er þannig metin á 200-250 þúsund danskar krónur, sem svarar til 3,6-4,5 milljóna íslenskra króna. Verði málverkin flutt til Íslands bætast við flutningsgjöld og virðisaukaskattur.

Á uppboði í Gallerí Fold í næstu viku eru nokkur verk eftir Kjarval og þau sem hæst eru metin eru verðlögð á 2,-2,5 milljónir króna, að því er fram kemur í umfjöllun um uppboðið í Morgunblaðinu í dag.