Óslóartréð ljósum prýtt á Austurvelli

Aðventan er gengin í garð því ljósin hafa verið tendruð á Óslóartrénu á Austurvelli. Að venju voru margir samankomnir í miðbænum að taka þátt í viðburðinum. Hinn norsk-íslenski Jónas Hrafn Gunnarsson sem er sjö ára gamall aðstoðaði Dag B. Eggertsson borgarstjóra við að kveikja á jólaljósunum. 

Jólasveinarnir stálust líka snemma í bæinn og tóku lagið með krökkunum. Elísabet Ormslev og Sverrir Bergmann fluttu falleg jólalög ásamt hljómsveit. Lúðrasveit Reykjavíkur ásamt lúðrasveitinni Sagene Janitsjarkorps frá Ósló leiku einnig aðventu- og jólalög. Kynnir var Katla Margrét Þorgeirsdóttir og var dagskráin túlkuð á táknmáli. 

Line Steine Oma borgarfulltrúi í Ósló ávarpaði samkomuna og afhenti borgarstjóra bókagjöf til allra grunnskóla Reykjavíkur. Um er að ræða fjórar þýddar bækur eftir norska höfunda.

Órói Styrktarfélags lamaðra og fatlaðra prýðir jólatréð.