Þjóðverjar voru fjölmennastir

Rauntölur liggja nú fyrir um fjölda farþega sem komu með skemmtiferðaskipum til Reykjavíkur og Akraness síðastliðið sumar.

Alls voru 190 skipakomur farþegaskipa til Faxaflóahafna með 188.630 farþega. Fjölgun á skipakomum var 25% milli ára og fjölgun farþega var rúmlega 30%. Nýtingarhlutfallið er í kringum 94%. Á milli ára er 28% aukning í brúttótonnum skipa.

Eins og jafnan áður koma flestir ferðamennirnir frá Þýskalandi, eða tæplega 49 þúsund. Bandaríkjamenn voru rúmlega 38 þúsund og Englendingar 36 þúsund.

Á heimasíðu Faxaflóahafna hefur birst listi yfir þau skip sem hafa tilkynnt komu sína til Reykjavíkur/Akraness árið 2020. Þetta eru 82 skip og skipakomur verða 196 talsins, að því er fram kemur í Morgunblaðinu í dag.