Áslaug Arna Sigurbjörnsdóttir dómsmálaráðherra segir það vera af og frá að tengja Landsréttarmálið svokallaða við óeðlileg pólitísk afskipti framkvæmdavaldsins af skipan dómsvaldsins og að sú afstaða ríkisstjórnarinnar komi skýrt fram í greinargerð dómsmálaráðuneytisins til yfirdeildar Mannréttindadómstóls Evrópu.
Segist hún jafnframt vera þeirrar skoðunar að Landsréttarmálið eigi ekkert skylt við málsatvik í Póllandi. Ríkisstjórnin, sem áfrýjaði niðurstöðu Mannréttindadómstólsins um að dómsmálaráðherra hefði brotið lög við skipan dómara í Landsrétt, afgreiddi greinargerð vegna áfrýjunarinnar á föstudaginn var. Málið verður tekið fyrir hjá Yfirdeildinni hinn 5. febrúar.
„Mannréttindadómstóllinn klofnaði í afstöðu sinni í neðri deildinni og við teljum minnihlutaálitið þar vera vel rökstutt. Þar kemur meðal annars fram að álit Hæstaréttar varðandi túlkun á íslenskum lögum um að dómararnir séu löglega skipaðir sé rétt niðurstaða,“ segir Áslaug í umfjöllun um mál þetta í Morgunblaðinu í dag.