Þjóðveginum um Ljósavatnsskarð var lokað fyrr í kvöld. Vegurinn er lokaður við gatnamótin við Kross að austanverðu og við Stórutjarnir að vestanverðu. Snjóflóð féll á veginn í gærkvöldi en snjó hefur kyngt niður á svæðinu í dag.
Gert er ráð fyrir því að Öxnadalsheiði lokist í kvöld vegna veðurs og slæmrar færðar. Henni hefur verið haldið opinni í dag en talið er að vegurinn loki eftir að vakt starfsmanna Vegagerðarinnar lýkur klukkan tíu.
Siglufjarðarvegur um Almenninga er lokaður, sem og vegirnir um Víkurskarð, Hólasand, Mývatns- og Möðrudalsöræfi og Vopnafjarðarheiði.
Þá er gert ráð fyrir því að Hringveginum á Suðausturlandi, frá Lómagnúp að Jökulsárlóni verði lokað frá því klukkan átta í fyrramálið og fram að miðnætti annað kvöld.
Gul viðvörun er í gildi fyrir Vestfirði, Strandir, Norðurland, Austurland, Suðausturland og Miðhálendi.