Tveir á gjörgæslu eftir slysið við Óseyrarbryggju

Þrír piltar voru í bílnum sem fór fram af Óseyrarbryggju í Hafnarfirði í gærkvöldi og hafnaði í sjónum. 

Þeir voru allir fluttir á slysadeild til aðhlynningar, en tveir piltanna síðan færðir á gjörgæsludeild Landspítalans og er ástand þeirra alvarlegt. Þriðji pilturinn var lagður inn á aðra deild spítalans og er líðan hans eftir atvikum.

Þetta kemur fram í tilkynningu frá lögreglu en ekki er hægt að veita frekari upplýsingar um málið að svo stöddu.

Frétt af mbl.is

Viðbragðshópur Rauða krossins virkjaður

Slysið varð með þeim hætti að bíll piltanna, lítill jepplingur, fór í sjóinn við höfnina um klukkan 21 í gærkvöldi. Köf­ur­um frá slökkviliðinu á höfuðborg­ar­svæðinu tókst að ná piltunum út úr bíln­um og voru þeir fluttir á spít­ala hið snarasta. 

Samkvæmt upplýsingum frá slökkviliðinu fékk neyðarlínan tilkynningu um slysið klukkan 21:08. Fyrstu viðbragðsaðilar voru komnir að höfninni níu mínútum síðar, eða klukkan 21:17. Einn piltanna var þá kominn út úr bílnum og var að reyna að koma sér upp á bryggjuna. Kafarar slökkviliðsins náðu hinum piltunum tveimur úr bílnum. Klukkan 21:38 var búið að ná öllum úr bílnum. 

Þrír piltar voru í bílnum sem fór fram af Óseyrarbryggju í Hafnarfirði í gærkvöld og hafnaði í sjónum. Tveir eru á gjörgæslu en sá þriðji var lagður inn á aðra deild spítalans. mbl.is/Kristinn Magnússon

Lögreglan styðst við upptökur úr eftirlitsmyndavélum

Bíln­um var náð upp úr höfn­inni skömmu eft­ir miðnætti og nutu lög­regla og slökkvilið aðstoðar fimm kaf­ar­a frá séraðgerðadeild Land­helg­is­gæsl­unn­ar við aðgerðirn­ar. 

Svæðið er vaktað með eftirlitsmyndavélum og fékk lögreglan afhent myndefni í gærkvöldi sem varpar á ljósi hvernig slysið varð. Lúðvík Geirsson, hafnarstjóri hjá Hafnarfjarðarhöfnum, segir í samtali við mbl.is að lögreglan hafi fengið myndefni sem sýni slysstaðinn frá þremur eða fjórum sjónarhornum. 

Áfalla­hjálp­ar­t­eymi Rauða kross­ins mun styðja við ýmsa hlutaðeig­andi eft­ir því sem við á, í sam­ráði við áfallaráð Hafn­ar­fjarðarbæj­ar. Boðað hefur verið til bænastundar í Hafnarfjarðarkirkju síðdegis. 

Fréttin hefur verið uppfærð

• Blogga um frétt