Innlent | mbl | 5.2.2020 | 18:21 | Uppfært 23:24

Kaupmenn hlusti á meirihluta íbúa

Laugavegur frá Klapparstíg að Ingólfsstræti. mbl.is/Eggert Jóhannesson

Guðrún Jóhannesdóttir, eigandi verslunarinnar Kokku á Laugavegi, segir að kaupmenn í miðborginni ættu að hlusta á meirihluta íbúa á höfuðborgarsvæðinu sem eru hlynntir göngugötum í miðborginni.

Þetta kemur fram í aðsendri grein þar sem hún svarar grein sem Bolli Kristinsson, fyrrverandi kaupmaður, skrifaði í Morgunblaðið. Þar svaraði hann viðtali við Guðrún í ViðskiptaMogganum og sagði hana gera lítið úr áralangri baráttu kaupmanna gegn lokunum gatna, sem hafi stórskaðað rekstur.

Frétt af mbl.is

„Afgerandi meirihluti er gegn götulokunum“

Í svari Guðrúnar við grein Bolla segir hún að hann hafi gleymt í úttekt sinni afstöðu almennings til göngugatna því í könnun Miðborgarinnar okkar og Samtaka verslunar og þjónustu komi fram að 49,1% íbúa á höfuðborgarsvæðinu séu hlynnt göngugötum í miðborginni en 32,7% þeim mótfallin.

Hér að neðan má lesa grein Guðrúnar í heild sinni:

„Fyrir réttri viku birtist grein eftir Bolla Kristinsson, fyrrverandi kaupmann, hér í Morgunblaðinu. Í greininni kemur hann vel á framfæri afstöðu sinni og félaga sinna til göngugatna í miðborg Reykjavíkur. Margir kaupmenn eru honum sammála enda sýndi könnun sem gerð var af Miðborginni okkar og Samtökum verslunar og þjónustu að meirihluti kaupmanna við Laugaveg er mótfallinn göngugötum. Það sem hann aftur á móti gleymdi í úttekt sinni á könnuninni er afstaða almennings. Það er, afstaða viðskiptavina þessara kaupmanna. Nú er nokkuð langt um liðið síðan Bolli stundaði kaupmennsku en ég held að þá, líkt og nú, hafi meginreglan verið sú að uppfylla óskir viðskiptavinarins.

Samkvæmt umræddri könnun eru 49,1% íbúa á höfuðborgarsvæðinu hlynnt göngugötum í miðborginni. 32,7% eru þeim mótfallin. Gerðar hafa verið fleiri kannanir á afstöðu almennings til göngugatna og hafa þær allar verið á sama veg, fleiri eru með en á móti. Þessir höfuðborgarbúar eru viðskiptavinir verslana í miðborginni og ættu kaupmenn því að hlusta á þann hóp.

Það hefur mikið breyst í verslun á undanförnum árum. Um allan heim verða menn varir við samdrátt í smásölu og mikill hluti verslunar hefur færst yfir á netið. Um allan heim skella sífellt fleiri verslanir í lás. Í Bretlandi einu hafa tapast 57.000 störf í smásölu á örfáum misserum (tölur fengnar frá British Retail consortium, brc.org.uk). Miklar breytingar hafa átt sér stað í samkeppnisumhverfi íslenskrar verslunar. Nú eru kaupmenn í miðborginni ekki einungis að keppa um viðskiptavini við kaupmenn í öðrum hverfum borgarinnar, verslun í dag er alþjóðleg. Til landsins streyma bögglar og pinklar frá öllum heimshornum. Frá verslunarrisum sem erfitt er að keppa við. Við getum ekki brugðist við því með því að líta til fortíðar. Sá tími er liðinn að fákeppni geti ráðið viðhorfi kaupmanns til viðskiptavinarins. Við þurfum að bjóða upp á, ekki eingöngu fjölbreytt vöruúrval, heldur einnig upplifun sem heillar.

Í því efni hefur miðborg Reykjavíkur klárt forskot, ekki eingöngu er hún öflugasta verslunarsvæði landsins með 275 verslanir (Heimild: Rannsóknasetur verslunarinnar 2019) af ýmsum toga heldur er úrval annarrar þjónustu ótrúlegt. Í miðborginni eru, auk fjölbreyttrar verslunar, skóarar og skraddarar, lögfræðingar og læknar, dómarar og dómkirkja, bókasafn og listasafn, hárskerar og heilarar, gallerí og gróður. Það er hvergi skemmtilegra að rölta um, kíkja í búðir, fara á listasýningu og svo er hægt að kíkja inn á eitt af 225 kaffi- og veitingahúsum og næra sig og njóta. Jafnvel enda daginn í leikhúsi, gjörningi eða á tónleikum.

Gróskan er ótrúleg, á undanförnum misserum hafa sprottið upp margar nýjar verslanir, þar af nokkrar á Laugavegi. Barnafataverslunin Mói, lífsstílsverslunin Nomad, fataverslunin CNTMP og Reykjavik Raincoats svo nokkur dæmi séu nefnd. Enn fleiri hafa fundið sér stað í sístækkandi verslunarhverfi miðborgarinnar og hliðargötur eins og Njálsgata, Frakkastígur og Smiðjustígur hafa lifnað við. Aldrei hafa fleiri eða fjölbreyttari kaffi- og veitingahús boðið landsmenn velkomna allt frá Hlemmi og út á Granda. Ekki má gleyma Hafnartorgi þar sem má finna margar nýjar verslanir og veitingastaði. Undir Hafnartorgi er bílakjallari sem mun fullbyggður verða einn stærsti bílakjallari landsins. Bílastæðahús er að finna víðar, en í dag eru yfir 3.000 yfirbyggð stæði í miðborginni. Auk þess eru fjölmörg stæði á yfirborðinu. Svo er víða hiti í gangstéttum, enda tilvalið að fá sér heilsubótargöngu niður Laugaveginn þegar kalt er í veðri. Í miðborginni er eitthvað fyrir alla, bæði unga og aldna á öllum árstímum.

Það hefur mikið verið framkvæmt í miðborginni og nú þegar stærstu verkefnunum fer að ljúka er gaman að skoða allar breytingarnar sem hafa átt sér stað. Ný torg hafa orðið til, innigarðar þar sem hægt er að setjast niður og njóta. Nútímalegt húsnæði sem hentar betur fyrir verslun og aðra þjónustu. Nú þarf bara að bæta aðgengið að því húsnæði sem eldra er. Sú aðlögun verður auðveldari þegar minna pláss er tekið undir bíla og umferð. Komandi kynslóðir horfa í meira mæli til vistvænni ferðamáta og eru almennt mun hlynntari göngugötum. Þetta eru viðskiptavinir framtíðarinnar. Við sem eldri erum ættum að laga okkur að breyttum kröfum frekar en að horfa sífellt um öxl. Það er einnig ljóst að aðgengi fyrir þá sem erfitt eiga með gang mun batna til muna með bættri borgarhönnun. Það verður spennandi að fá meira pláss fyrir gangandi í miðborginni. Svæði þar sem auðvelt verður að athafna sig með hjólastól eða barnavagn. Brekkur og rampar í stað þrepa, meiri gróður og skjól. Meira mannlíf, betra líf.

Miðborgin okkar eru samtök verslunar- og veitingafólks sem vinna sameiginlega að markaðssetningu miðborgarinnar.

Undirrituð er kaupmaður í versluninni Kokku og hefur rekið verslun í miðborginni í nær tvo áratugi, auk reksturs verslana í Kringlunni og Smáralind. Miðborgin okkar eru samtök verslunar- og veitingafólks sem vinna sameiginlega að markaðssetningu miðborgarinnar. Í stjórn samtakanna situr fjölbreyttur hópur fólks sem fulltrúar allra svæða miðborgarinnar. Stjórnin vinnur í þágu allra félagsmanna burtséð frá afstöðu þeirra (eða sinni) til göngugatna. Því þegar öllu er á botninn hvolft er það afstaða viðskiptavinarins, en ekki kaupmannsins, sem skiptir máli.

Höfundur er eigandi verslunarinnar Kokku á Laugavegi.“