Innlent | mbl | 5.2.2020 | 11:34 | Uppfært 12:52

Verkfall hefst á miðnætti í kvöld

Áhrifa verkfalla gætir mest á skóla- og frístundasviði þar sem um 1.000 félagsmenn Eflingar starfa. mbl.is/Hari

Fyrirhugað verkfall félagsmanna Eflingar sem starfa hjá Reykjavíkurborg hefst á miðnætti í kvöld og stendur til miðnættis annað kvöld. Verkfallsaðgerðirnar munu skerða þjónustu leikskóla borgarinnar, velferðarþjónustu og sorphirðu.

Um 1.850 manns í Eflingu starfa hjá borginni á um 129 starfsstöðvum. Mest verða áhrif verkfallsaðgerða á skóla- og frístundasviði þar sem um eitt þúsund Eflingarstarfsmenn starfa, mikill meirihluti þeirra í leikskólum.

Gert er ráð fyrir að verkfallið hafi áhrif á um rúman helming leikskólabarna í borginni eða 3.500 börn. Þeim börnum sem fá vistun verður skipt upp í hópa, einn fyrir hádegi og annar eftir hádegi. Þá er fyrirséð að matarþjónusta í einhverjum grunnskólum borgarinnar raskast og þurfa nemendur þar að koma með nesti í skólann.

Frétt af mbl.is

Hefur mestar áhyggjur af einstæðum foreldrum

Í gær var fyrsti dagur verkfallsaðgerða og ljóst er að þær höfðu töluverð áhrif á atvinnulífið því foreldrar, ömmur og afar þurftu að sækja börn í leikskólana um hádegi. Þeir sem mbl.is ræddi við höfðu þó skilning á aðgerðunum og sögðust styðja þær.

Foreldrar/forráðamenn greiða ekki leikskólagjöld fyrir þá daga sem verkfall stendur yfir og ekki heldur fyrir máltíðir sem falla niður, að fram kemur í tilkynningu frá Reykjavíkurborg.

Undanþágur til að sinna viðkvæmustu þjónustunni

Velferðarsvið fékk undanþágur frá verkfallsaðgerðum fyrir starfsfólk Eflingar sem sinnir viðkvæmustu þjónustunni er snýr að umönnun fatlaðs fólks, barna, aldraðra á hjúkrunarheimilum og í heimahúsum, barna og fólks sem þarf á neyðarþjónustu að halda í gistiskýlum.

Frétt af mbl.is

„Í rauninni er þetta ekki boðlegt“

Hins vegar mun verkfallið hafa áhrif á um 1.650 notendur velferðarþjónustu. Þrif á heimilum fatlaðs fólks og aldraðra falla niður, sömuleiðis aðstoð við böðun. Ekki verður hægt að kaupa máltíðir í félagsmiðstöðvum og þá verður dagdvöl í Þorraseli lokuð meðan á verkfalli stendur.

Hjá Sorphirðunni frestast þjónusta sem og vetrarþjónusta eins og hálkuvarnir og snjóhreinsun.

Verkfallsaðgerðirnar ná yfir sex daga í um 95 klukkustundir alls, ýmist frá hádegi til miðnættis eða í heilan sólarhring. Náist ekki samningar fyrir 17. febrúar leggja félagsmenn niður störf sama dag og ótímabundið eftir það.