Jarðskjálfti, 3,6 að stærð, varð í Bárðarbungu rétt fyrir klukkan sex í morgun. Samkvæmt upplýsingum frá Veðurstofunni hafa engir eftirskjálftar fylgt og engin merki um gosóróa.
Upptök skjálftans voru í norðanverðri Bárðarbunguöskjunni. Engin merki eru um aðra skjálftavirkni á svæðinu en fylgst verður áfram með gangi mála. Um þrjár vikur eru síðan skjálfti af svipaðri stærð varð í Bárðarbungu.