Ótímabundið verkfall starfsmanna Eflingar, sem vinna hjá Reykjavíkurborg, hófst á miðnætti. Samkvæmt upplýsingum frá Reykjavíkurborg starfa um 1.850 félagsmenn Eflingar á 129 starfsstöðvum borgarinnar. Ekki hefur verið boðað til samningafundar í deilunni.

Áhrif verkfallsins verða mest á leikskóla, auk þess sem matarþjónusta í grunnskólum fellur niður. Standi verkfallið í lengri tíma gæti einnig þurft að loka grunnskólum þar sem ekki má halda þeim opnum nema þrifið sé reglulega. Þeim börnum sem fá vistun í leikskólum verður skipt upp í hópa og er sums staðar hafður sá háttur á að einn hópur fær vist fyrir hádegi og annar eftir hádegi eða skipt niður á daga vikunnar.

Velferðarsvið borgarinnar hefur fengið undanþágur frá verkfallsaðgerðum fyrir starfsfólk Eflingar sem sinnir viðkvæmustu þjónustunni sem snýr að umönnun fatlaðs fólks, aldraðra á hjúkrunarheimilum og í heimahúsum, barna og fólks sem þarf á neyðarþjónustu í gistiskýlum að halda.

Á heimasíðu borgarinnar eru talin upp verkefni sem ekki verður sinnt meðan á verkfalli stendur. Má þar nefna að ekki verður gert við brotholur í malbiki, ruslatunnur verða ekki tæmdar í borgarlandinu, grenndargámar ekki hreinsaðir, verkefnum sem tengjast óveðri ekki sinnt og síðast en ekki síst verða lausir hestar, sem kunna að valda truflunum, ekki handsamaðir.

Tengdar fréttir

Kjaraviðræður

Þarf að koma til móts við ólíkar þarfir lækna

• Þung staða í kjaradeilu kennara
• Reiðubúin að aflýsa verkföllum í fjórum leikskólum
• Boða verkföll í 10 leikskólum til viðbótar
• Viðræður ekkert þokast frá því á þriðjudag

» Fleiri tengdar fréttir

• Blogga um frétt