Undirskriftalisti með tæplega átta þúsund undirskriftum var afhentur í dómsmálaráðuneytinu og forsætisráðuneytinu þar sem því er mótmælt að 17 ára írönskum transdreng og fjölskyldu hans hefur verið synjað um alþjóðlega vernd á Íslandi.

Mótmælin voru skipulögð af No Borders Iceland, Samtökunum ´78, Q-félagi hinsegin stúdenta, Solaris, Rétti barna á flótta og Trans Íslandi.

Transdrengurinn, sem heitir Maní, er sem stendur í hvíldarinnlögn á BUGL.

„Engin stofnun stjórnvalda hefur svarað ítrekuðum fyrirspurnum lögmanns fjölskyldunnar, hvorki hvað varðar stöðu brottvísunar né varðandi afhendingu á nauðsynlegum gögnum málsins. Þetta á við um dómsmálaráðuneytið, kærunefnd útlendingamála, Útlendingastofnun og lögregluna,“ segir í tilkynningu frá No Borders Iceland.