Víða er búið að loka ruslatunnum í miðbænum til að koma í veg fyrir óþrifnað nálægt þeim en þær hafa ekki verið tæmdar frá því verkfall Eflingar hófst í byrjun síðustu viku, hið minnsta. Rekstraraðilar hafa brugðið á það ráð að hylja tunnurnar með pokum og líma þá fasta. Hvert ruslið leitar í staðinn er óvíst.

Fyrr í vikunni var fjallað um að ruslið væri byrjað að flæða upp úr tunnum bæjarins og þeir sem stæðu í rekstri væru sjálfir farnir að tæma þær. Sorphirðufólk í Reykjavík sem er félagsbundið í Eflingu er í ótímabundnu verkfalli og tunnurnar verða ekki tæmdar fyrr en kjaradeila borgarinnar og Eflingar leysist.