Alþjóðleg ráðstefna um kynbundið ofbeldi haldin hér 2021

15 milljónum króna af ráðstöfunarfé ríkisstjórnar verður veitt til að standa að alþjóðlegri ráðstefnu samtaka sem berjast gegn kynferðislegu og kynbundnu ofbeldi og áreitni á Íslandi 2021. Ríkisstjórnin samþykkti þetta á fundi sínum á föstudag. 

Skipuleggjendum þótti Ísland kjörin staðsetning, meðal annars með vísan til lýðræðis og friðar og til vel heppnaðrar #metoo-ráðstefnu síðastliðið haust. Slíkur fundur var haldinn í Brighton á Englandi árið 1996, eða einmitt ári eftir Peking-yfirlýsingu Sameinuðu þjóðanna. 

Borgarstjórinn í Reykjavík hefur boðað að Reykjavíkurborg muni einnig leggja til framlag þannig að hún verður haldin í samstarfi ríkis og borgar. Ráðstefnan verður haldin í Hörpu 6.–8. maí 2021.

Forsætisráðherra hugðist halda ræðu á þrjátíu ára afmæli Stígamóta í dag og greina frá þessu. Afmælishátíðinni var frestað vegna kórónuveiru.

Þetta kemur fram á vef Stjórnarráðs Íslands. 

• Blogga um frétt