Innlent | mbl | 22.3.2020 | 18:41 | Uppfært 20:00

Segir Persónuvernd fremja glæp

Kári Stefánsson. mbl.is/Eggert Jóhannesson

„Persónuvernd vinnur ekki um helgar þótt ekki bara Róm heldur allar borgir heimsins brenni.“

Þetta skrifar Kári Stefánsson, forstjóri Íslenskrar erfðagreiningar, í harðorðum pistli á Facebook þar sem hann fjallar um niðurstöður skimana ÍE fyrir kórónuveirunni, sem hann segir nauðsynlegt að birta í ritrýndu vísindatímariti.

Frétt af mbl.is

„Nú er bara að keyra þetta í gang“

„Eitt af því sem hefur vantað hjá þeim sem eru að sem eru að hanna aðgerðir til þess að hægja á faraldrinum úti í heimi eru upplýsingar um það hversu víða veiran finnst í þeim hluta samfélags sem ekki er talinn í hættu. Við erum eina landið í heimi sem í dag býr að slíkum upplýsingum vegna skimunar Íslenskrar erfðagreiningar. Sú skimun var gerð í þeim tilgangi einum að gagnast þeim sem vinna við að hefta faraldurinn hér á landi. Nú eru yfirvöld víða um heim farin að biðja um upplýsingar,“ skrifar Kári og að New England Journal of Medicine hafi beðið ÍE að birta hjá sér þessar niðurstöður og heitið því að gera það mjög hratt.

„Skimunin okkar var einfaldlega þjónusta við heilbrigðiskerfið en til þess að setja niðurstöðurnar í samhengi sem hægt væri að setja í vísindagrein urðum við að sækja um leyfi til vísindarannsóknar sem við gerðum. Við sendum umsókn til vísindasiðanefndar á föstudaginn sem afgreiddi hana á nokkrum klukkutímum. Síðan sendi nefndin afgreiðslu sína á umsókninni til Persónuverndar.“

Kári segir hlutverk Persónuverndar einfaldlega að ganga úr skugga um að rannsóknin og framkvæmd hennar brjóti ekki í bága við persónuverndarlögin.

Engin áhrif að fjöldi smitaðra myndi þrefaldast frá föstudegi til mánudags

„Þegar við höfðum samband við fulltrúa Persónuverndar á föstudaginn sagði hann að Persónuvernd myndi afgreiða umsóknina eftir helgina. Það hafði engin áhrif á þá virðulegu stofnun að fjöldi smitaðra í heiminum myndi þrefaldast frá föstudegi til mánudags og hugmyndin væri að reyna að nota þá innsýn sem fengist við að skoða niðurstöður frá Íslandi til þess að hafa áhrif á aðgerðir til að hamla útbreiðslu. Þessi afstaða Persónuverndar er með öllu óskiljanleg og algjörlega úr takt við afstöðu manna í samfélaginu almennt sem eru að snúa bökum saman í baráttunni og þurfa enga hvatningu til þess að vinna dag og nótt og setja sjálfa sig í smithættu. Persónuvernd vinnur ekki um helgar þótt ekki bara Róm heldur allar borgir heimsins brenni.

Þess ber líka að geta að Evrópusambandið sem gaf út þá reglugerð sem persónuverndarlög okkar byggjast á hefur gefið til kynna að persónuverndarsjónarmiðin verði að víkja að því marki sem sú nauðsyn krefur að rannsaka faraldurinn.

Með þessari afstöðu sinni er Persónuvernd að fremja glæp. Fólk er að veikjast, fólk er að deyja, heimur að hrynja og Persónuvernd segir: Við afgreiðum þetta eftir helgi.“