Um fjögur þúsund umsóknir um atvinnuleysisbætur vegna skerts starfshlutfalls höfðu borist Vinnumálastofnun klukkan 16 í dag. Opnað var fyrir umsóknir í hádeginu.

Alþingi samþykkti á föstudag frumvarp Ásmundar Einars Daðasonar, félags- og barnamálaráðherra, um rétt til greiðslu at­vinnu­leys­is­bóta sam­hliða minnkuðu starfs­hlut­falli vegna tíma­bund­ins sam­drátt­ar í starf­semi vinnu­veit­enda, svokallaða hlutastarfaleið.

Samkvæmt lögunum getur fólk sem verið hefur í fullu starfi farið niður í allt að 25 prósenta starfshlutfall og átt rétt á bótum. Þeir sem eru með 400 þúsund eða minna í mánaðarlaun fá fullar bætur á móti skertu hlutfalli í vinnu. Sótt er um í gegnum mínar síður á heimasíðu Vinnumálastofnunar.

Í tilkynningu frá Stjórnarráðinu segir að stefnt sé að því að greiða fyrstu greiðslurnar 31. mars. Einhverjar greiðslur geti hins vegar dregist fram í byrjun apríl. Allar umsóknir gildi afturvirkt frá 15. mars.

Aðgerðirnar séu að virka

Haft er eftir Ásmundi að markmiðið með lagasetningunni sé einfalt; að stuðla að því að vinnuveitendur haldi ráðningarsambandi við starfsmenn sína eins og frekast sé unnt. 

„Þessi miklu viðbrögð sýna að þessar aðgerðir eru að virka og við ætlum að fara í gegnum þetta saman og að hér verði kröftug viðspyrna í þessu tímabundna ástandi sem faraldurinn er.”

Haft er eftir Unni Sverrisdóttur, forstjóra stofnunarinnar, að fagnaðarefni sé hversu hratt hafi gengið að vinna þetta verkefni. Mikið álag hafi verið á vef stofnunarinnar í dag.

„Umsóknirnar sem okkur hafa borist í dag eru fjölmargar og við hvetjum bæði atvinnurekendur og launafólk til þess að kynna sér þessi úrræði vel.”

Tengdar fréttir

Kórónuveiran Covid-19

„Er ég virkilega að deyja?“

• Rétti barni sínu frekar sígarettur en iPad
• Eitt bóluefni verður í boði gegn covid-19 í vetur
• Varar við fleiri tilfellum í vetur
• Bóluefni hafi fækkað dauðsföllum

» Fleiri tengdar fréttir

• Blogga um frétt