Innlent | mbl | 14.4.2020 | 14:20

Engin lyf fundust hjá bakverðinum

starfaði sem bakvörður í heilbrigðisþjónustu á hjúkrunarheimilinu Bergi í Bolungarvík þangað á föstudaginn langa, þegar hún hún var handtekin, sökuð um að hafa framvísað fölsuðum gögnum og misfarið með lyf.

Engin lyf fundust við húsleit í vistarverum Önnu Auroru Waage, bakvarðarins sem handtekin var fyrir helgi. Þetta staðfestir Karl Ingi Vilbergsson, lögreglustjóri á Vestfjörðum, í samtali við mbl.is.

Anna Aurora greindi frá því í viðtali við Mannlíf um helgina að hún væri búin að ráða sér lögmann til að stefna Gylfa Ólafssyni, forstjóra Heilbrigðisstofnunar Vestfjarða, og lögreglustjóranum á Vestfjörðum. Hún starfaði sem bakvörður í heilbrigðisþjónustu á hjúkrunarheimilinu Bergi í Bolungarvík þangað á föstudaginn langa, þegar hún var handtekin, sökuð um að hafa framvísað fölsuðum gögnum og misfarið með lyf. Hún segist vera alsaklaus og hún hafi ekkert að fela. Hún segist jafnframt hafa verið meðhöndluð eins og stórglæpamaður. Lögreglustjóranum hefur ekki borist stefna að sögn Karls.

Frétt af mbl.is

Bakvörðurinn lýsir yfir sakleysi sínu

Rannsókninni miðar vel að sögn Karls en ljóst er að hún mun taka tíma, líklega nokkrar vikur, þar sem um skjalarannsókn er að ræða. Á laugardag fóru fram yfirheyrslur á vitnum, það er liðsmönnum í bakvarðasveitinni og öðru heilbrigðisstarfsfólki.

„Við erum með til skoðunar þessa pappíra sem hún framvísaði þegar hún sótti um að komast í bakvarðasveitina og að staðreyna þessar upplýsingar sem þar er að finna.“

Leitað var í vistarverum Önnu Auroru og lagði lögregla hald á pappíra og minnisbækur að sögn Karls. „En ég get staðfest það að það fundust engin lyf hjá henni. Sumir þessir pappírar eru frá erlendum stofnunum þannig að við þurfum að fá staðfestingu hjá þeim og það mun taka einhverjar vikur. Svona skjalarannsóknir taka tíma.“

Málið er rannsakað sem stakt og einangrað mál og eru fyrri möguleg brot konunnar ekki hluti af rannsókn lögreglunnar á Vestfjörðum.