Hópur á vegum smitsjúkdómalækna hefur til skoðunar í samvinnu við Blóðbanka Íslands hvort hægt sé að nota blóðvökva úr þeim sem hafa myndað mótefni gegn veirunni og er batnað af COVID-19-sjúkdómnum sem kórónuveiran veldur. Þetta kom fram í hádegisfréttum RÚV.
Rætt var við Má Kristjánsson, yfirlækni smitsjúkdómadeildar Landspítala. Í máli hans kom fram að rannsóknin væri á frumstigi. Aðferðin væri eingöngu ætluð þeim sem væru veikir af sjúkdómnum.
Fram hefur komið að læknum í Suður-Kóreu hefur tekist að bjarga lífi tveggja sjúklinga sem veikst höfðu alvarlega af völdum COVID-19 með blóðvökvameðferð.