Ferðamaður í rigningu á Hakinu á Þingvöllum

Nú er hún Snorrabúð stekkur, orti listaskáldið um fallandi frægð Þingvalla og víst er margt þar nú með breyttum brag frá því sem var. Venjulega er iðandi líf á svæðinu og ferðamenn í þúsundatali þar daglega.

Einn ferðalangur stóð á Hakinu í gær og virti fyrir sér ágætt útsýnið þar á annars regnvotum vordegi.

Þjónustumiðstöð og gestastofa á Þingvöllum hafa verið lokuð síðan samkomubann gekk í gildi, en verða opnuð 4. maí næstkomandi og er þess þá vænst að ferðamönnum fari aftur að bregða fyrir.