Líðan ungs fólks sérstakt áhyggjuefni nú

„Margir hafa áhyggjur af því hvort þeir séu „nógu veikir“. Svarið er að það er ekkert áhyggjuefni of ómerkilegt til að hafa samband. Ungt fólk er að takast á við svo margt og við viljum hjálpa því,“ segir Sigurþóra Bergsdóttir, framkvæmdastjóri Bergsins headspace.

Bergið er stuðnings- og ráðgjafarsetur fyrir ungt fólk upp að 25 ára aldri. Sigurþóra er vinnusálfræðingur og stofnaði Bergið í fyrra. Hún hefur reynslu af vandamálum ungs fólks sem aðstandandi, en sonur hennar svipti sig lífi árið 2016 eftir að hafa gengið í gegnum mikla erfiðleika.

Mikið álag hefur verið á landsmönnum vegna kórónuveirunnar. Margir hafa verið fastir heima og hefðbundið lífsmynstur í tengslum við skóla og vinnu riðlast. Sigurþóra segir að ástæða sé til að hafa sérstakar áhyggjur af líðan ungs fólks. Framhaldsskólanemendur hafa til að mynda verið í fjarkennslu síðustu vikur og búast má við því að þeim gangi misvel að aðlagast því.

„Ég hef skynjað ástandið og þetta samkomubann eins og fólk sé að halda niðri í sér andanum. Ungmenni hafa upplifað þetta eins og frí og verið að ýta hlutum svolítið á undan sér. Við höfum hins vegar þá tilfinningu að þegar samfélagið fer að hrökkva í gang á ný fari að koma að skuldadögum og afleiðingarnar komi í ljós,“ segir hún í umfjöllun um mál þetta í Morgunblaðinu í dag.