Ferðamálastofa hefur upp á síðkastið fengið tíu beiðnir um niðurfellingu rekstrarleyfis ferðaskrifstofa.
Samkvæmt upplýsingum frá Helenu Þ. Karlsdóttur, forstöðumanni stjórnsýslu- og umhverfissviðs Ferðamálastofu, hefur stofnunin ekki innkallað nein leyfi vegna kórónuveirufaraldursins.
Helena segir í svari við fyrirspurn blaðsins að þrjár af þeim tíu beiðnum sem borist hafi um niðurfellingu séu bein afleiðing kórónuveirufaraldursins.
„Allt eru þetta aðilar með litla sem enga starfsemi. Þrír af þessum aðilum eru ekki að hætta rekstri heldur einungis draga saman starfsemi sína og hætta að selja pakkaferðir. Þeir þurfa því að sækja um annars konar leyfi,“ segir Helena ennfremur í Morgunblaðinu í dag.