10 mánaða dómur fyrir milljóna fjárdrátt frá ADHD-samtökunum

Fyrrverandi framkvæmdastjóri ADHD-samtakanna hefur verið dæmdur í héraðsdómi í 10 mánaða fangelsi fyrir að hafa dregið sér 9,2 milljónir króna af fjármunum félagsins og nýtt það í eigin þágu. Maðurinn, sem heitir Þröstur Emilsson, var framkvæmdastjóri samtakanna frá 2013 fram á mitt ár 2018 þegar málið kom upp. Var honum þá vikið úr starfi og kærði stjórn félagsins brot hans til lögreglu.

Frétt af mbl.is

Framkvæmdastjóri kærður fyrir fjárdrátt

Þröstur, sem sjálfur varði sig í dómsmálinu, játaði brot sín skýlaust. Fram kemur í ákæru málsins að hann hafi dregið sér fjármunina með að millifæra á eigin reikning og greiða með debet og kreditkorti í verslunum. Þá millifærði hann einnig upphæðir upp á hundruð þúsunda inn á veitingaþjónustu, reikning háskóla og greiddi hundrað þúsund krónur í styrk til Viðreisnar, en Þröstur var í þriðja sæti á lista flokksins í bæjarstjórnarkosningum flokksins árið 2018.

Meðal úttekta á kreditkorti félagsins eru ferðalög erlendis, líkamsrækt, flugeldar og ýmiskonar verslun bæði innanlands og erlendis.

Var hann sem fyrr segir dæmdur í 10 mánaða fangelsi, þar af sjö mánuði skilorðsbundna. Þá var hann dæmdur til að greiða samtökunum 9,2 milljónir auk vaxta.

• Blogga um frétt