Reglur fyrir erlend tökulið til skoðunar

Einar Hansen Tómasson, verkefnastjóri hjá Íslandsstofu, segir hugmyndir að viðmiðunarreglum fyrir erlend tökulið kvikmynda og sjónvarpsþátta nú til skoðunar hjá landlæknisembættinu vegna kórónuveirufaraldursins.

Erlendir kvikmyndaframleiðendur séu í auknum mæli að leita að öruggum löndum fyrir tökur á kvikmyndum og sjónvarpsþáttum og Ísland sé þar ofarlega á blaði.

„Þetta er líklega sá hópur sem auðveldast er að fá inn í landið í dag,“ segir Einar í umfjöllun um mál þetta í Morgublaðinu í dag. Tökulið geti flogið beint hingað með leiguflugi, farið strax á hótel og þaðan á tökustað. Einar fékk stjórn Samtaka íslenskra kvikmyndaframleiðenda til liðs við sig við gerð viðmiðunarreglna.