Ekkert nýtt kórónuveirusmit greindist hérlendis síðasta sólarhring. Á sýkla- og veirufræðideild Landspítalans voru 95 sýni greind, en 367 hjá Íslenskri erfðagreiningu.
26 eru með virkt smit og hafa þau ekki verið færri síðan 3. mars, en 1.765 hafa náð sér af kórónuveirunni hérlendis. Þrír liggja á sjúkrahúsi en enginn er á gjörgæslu, að því er fram kemur á covid.is. Tíu eru látin af völdum COVID-19.
Alls hafa 52.745 sýni verið tekin og 1.801 greinst með veiruna hér á landi. 699 eru í sóttkví en 19.462 hafa lokið sóttkví.