Er viðbúin öllu í uppgreftrinum

Fornleifarannsókn á Stjórnarráðsreitnum hófst á ný 1. apríl. Vala Garðarsdóttir fornleifafræðingur, sem stjórnar rannsókninni, sagði stefnt að því að nýta sumarið og vinna að uppgreftrinum til loka ágúst.

„Svæðið er um 1.300 fermetrar og við erum búin með um það bil 500 fermetra,“ sagði Vala. Til þessa hafa verið rannsakaðar minjar frá 18., 19. og byrjun 20. aldar. Sjö vinna að rannsókninni á vettvangi og einn starfsmaður er í skráningu og gagnaöflun.

Eins og sjá má á myndinni er komið í ljós mannvirki frá fyrri tíð. Vala sagði að þarna væri um að ræða drenlögn, þ.e. frárennsli fyrir jarðvatn, sem er hlaðin úr grjóti og lítur út eins og lágur veggur. Undir er skurður. Drenið nær frá Hverfisgötu, utan við þetta svæði, og alveg að Stjórnarráðshúsinu. Svo er önnur alveg eins lögn nær Bankastræti.

„Það er til mynd af þessu dreni frá 1905. Steyptur grunnur sem sést einnig á myndinni er af húsi sem var reist 1904. Það var byggt við það 1915 og húsið rifið 1967. Það þjónaði sem geymsluhús og íveruhús seinna meir,“ segir Vala í umfjöllun um mál þetta í Morgunblaðinu í dag.