Íbúar höfuðborgarsvæðisins hafa varla farið varhug af nokkrum fjölda matarvagna sem ferðast á milli hverfa og selja gestum og gangandi mat og hafa gert undanfarna daga og vikur.
Um er að ræða framtakið Götubiti á hjólum, sem gripið var til vegna samkomutakmarkana í kórónuveirufaraldri, en þar geta matargestir verslað við mismunandi matarvagna, ýmist í gegnum bílalúgu eða venjulega lúgu, allt eftir aðstæðum.
Matarvagnarnir voru í Garðabæ í kvöld og létu viðtökur bæjarbúa og annarra ekki á sér standa í góða veðrinu. Ljósmyndari mbl.is renndi við og fangaði stemninguna.
Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.