Of langt gengið í þéttingu byggðar

Stjórnir þriggja búasamtaka í Reykjavík; miðborgar, Vesturbæjar og þriðja hverfis (Hlíða, Holta og Norðurmýrar) telja að borgaryfirvöld hafi gengið of langt í þéttingu byggðar í hverfunum. Þetta kemur fram í sameiginlegri yfirlýsingu þeirra sem send var til fjölmiðla í morgun.

„Borgaryfirvöld hafa gengið of langt í þéttingu byggðar í ofangreindum hverfum. Enda þótt þétting byggðar sé almennt af hinu góða er nú svo komið að á vissum svæðum er hreinlega um ofþéttingu að ræða. Borgaryfirvöld leggja áherslu á að þéttingin eigi fyrst og fremst að vera á eldri atvinnulóðum og öðrum vannýttum svæðum. Í reynd hefur óhikað verið gengið á græn svæði borgarinnar sem eru nú þegar af skornum skammti. Erlend úttekt frá 2018 leiddi í ljós að Reykjavík var þá í 37. sæti af 50 borgum heims þegar hlutfall grænna svæða innan raunverulegra borgarmarka var skoðað þar sem aðeins 18% borgarlandsins taldist grænt svæði, samanborið við tæp 57% í Prag sem tróndi efst á listanum.

Úr Aðalskipulagi Reykjavíkur 2010-2030:

Útivistarsvæði myndi samfelldan vef eða grænt net um borgarlandið. Hann tengi saman hverfi, heimili, þjónustu og atvinnusvæði og tryggi tengsl íbúðarbyggðar við fjölbreytt náttúru- og útivstarsvæði.

Rannsóknir sýna einnig í síauknum mæli að í borgarlandslagi eru græn svæði mjög mikilvæg vegna almennrar lýðheilsu. Í Reykjavík hefur endurtekið verið þrengt að skólalóðum og þar með útivistarsvæðum skólabarna í borginni og því er enn mikilvægara en ella að standa vörð um þau grænu og opnu svæði sem eru í nágrenni skólalóða sem eftir eru í stað þess að skipuleggja þau undir sífellt þéttari byggð.

Á sameiginlegum fundi íbúasamtaka í vesturhluta borgarinnar komu fram verulegar áhyggjur af því að sýn varðandi grænt net og gæði útivistarsvæða sé  ekki að raungerast sem skyldi við þéttingu byggðar. Þá kom einnig skýrt fram að íbúar hafi ítrekað bent á þessa þróun í gegnum athugasemdir sínar við deiliskipulagsvinnu borgarinnar. Málsmeðferð deiliskipulagsbreytinga ber þess merkis að vera eingöngu formlegs eðlis þar sem íbúum gefst í reynd ekki tækifæri til að hafa raunveruleg áhrif. Réttur til athugasemda er lítils virði ef einungis er tekið mark á athugasemdum frá opinberum aðilum en látið hjá líða að taka mark á athugasemdum íbúa. Samráðsleysið við borgarbúa, sem ítrekað benda á hvernig auka megi gæði almenningsrýma, er áberandi.

Fundurinn skorar á borgaryfirvöld í fyrsta lagi að íhuga alvarlega og með gagnrýnum huga gildandi stefnu um þéttingu byggðar og í öðru lagi að fjárfest verði í því að greina samráðsferlið með tilliti til skilvirkni, gagnsæis og notendavænni ferla.

Að lokum minnum við á að gefnu tilefni að Íbúasamtök hafa það að markmiði að vera rödd íbúa og augu yfirvalda í hverfunum. Íbúasamtök vakta gæði borgarrýmis með hagsmuni almennings fyrir augum, og enginn þekkir nærumhverfi sitt betur en íbúarnir sjálfir,“ segir í yfirlýsingunni en undir hana rita: Ásta Olga Magnúsdóttir, formaður Íbúasamtaka Vesturbæjar, Benóný Ægisson, formaður Íbúasamtaka miðborgar Reykjavíkur, og María Hjaltalín, formaður Íbúasamtaka 3. hverfis.

• Blogga um frétt