Töluverð umferð var inn til Reykjavíkur í gær og þyngdist eftir því sem leið á daginn. Að sögn lögreglu gekk hún þó smurt fyrir sig og kom ekkert teljandi upp á.
Um er að ræða fyrstu ferðahelgi í langan tíma, enda fyrsta langa helgi eftir að helstu takmörkunum vegna kórónuveirufaraldursins var létt.
Landsmenn flykktust að nokkru marki norður í land, þar sem spáð var bestu veðri. Á tjaldstæðinu á Húsavík voru hjólhýsin allsráðandi en minna um tjöld. Þegar umferðin fór að þyngjast norður í land á föstudaginn sagði lögregluþjónn á Norðurlandi vestra við mbl.is að merkja mætti mjög aukinn fjölda húsvagna í eftirdragi en síðustu helgar. Ferðasumarið væri byrjað.