„Við viljum nýta dagana sem fram undan eru mjög vel og leita allra leiða til að forðast verkfall,“ segir Sverrir Jónsson, formaður samninganefndar ríkisins, í samtali við mbl.is. Samningafundur í kjaradeilu hjúkrunarfræðinga og ríkisins er nýhafinn hjá ríkissáttasemjara. 

Hjúkr­un­ar­fræðing­ar samþykktu á föstudag að fara í ótíma­bundið verk­fall frá 22. júní, eftir tvær vikur. Rúm 85% fé­lags­manna FÍH samþykktu verk­falls­boðun­ina. 

Frétt af mbl.is

„Mjög skýr skilaboð“

Sverrir segir samninganefndirnar hafa átt í góðu samstarfi allan samningstímann. Enn beri þó mikið í milli og sé það helst launaliðurinn sem viðræðurnar stranda á. Krafa hjúkrunarfræðinga felst í hækkun grunnlauna en Sverrir segir að ríkið hafi teygt sig eins langt og kostur er. 

Hefur áhrif á allt heilbrigðiskerfið

Verkfallið mun hafa víðtæk áhrif, ekki síst á Landspítalanum, og sagði Páll Matthíasson, forstjóri Landspítalans, í forstjórapistli sínum fyrir helgi að án hjúkrunarfræðinga væri ekki hægt að reka sjúkrahús. „Ábyrgð samn­ingsaðila er gríðarleg. Af verk­falli má ekki verða, svo ein­falt er það,“ sagði Páll meðal annars. 

Frétt af mbl.is

„Af verkfalli má ekki verða“

Verkfallið mun einnig hafa áhrif á skimun við opnun landamæra síðar í þessum mánuði. Fram kom í máli framkvæmdastjóra hjúkrunar hjá Heilsugæslu höfuðborgarsvæðisins í kvöldfréttum RÚV í gær að skimunin væri ógerleg án aðkomu hjúkrunarfræðinga. Aðspurður hvort það setji aukna pressu á samningaviðræðurnar segir Sverrir: „Störf hjúkrunarfræðinga eru mikilvæg og þetta hefur áhrif á allt heilbrigðiskerfið og öll verkefnin sem við stöndum frammi fyrir, en ég vil ekki draga eitt fram umfram annað.“

Tengdar fréttir

Kjaraviðræður

Vilja hækka frítekjumörk og tekjur

• Nýr kjarasamningur Eflingar samþykktur
• Ellefu mál á borði sáttasemjara
• Vísa kjaradeilu tollvarða til gerðardóms
• Lögreglumenn fella kjarasamning

» Fleiri tengdar fréttir

• Blogga um frétt