„Þetta eru áföll sem bændur þurfa að takast á við og ekkert annað í boði en að halda áfram og leita eftir heyfeng annars staðar í sumar,“ segir Ævar Marinósson, bóndi í Tunguseli, innsta býlinu á Langanesi.
Tún hans koma mjög illa undan vetri og segir Ævar að hátt í 90 prósent þeirra séu svo kalin að þau megi heita ónýt.
Svipuð staða er á bænum Syðra-Álandi í Þistilfirði og líklega fleiri bæjum. Segir bóndinn þar, Ólafur Birgir Vigfússon, að þeir bændurnir skoði nú í sameiningu möguleika á landnýtingu annars staðar því þeirra tún séu nánast gagnslaus þetta sumar.