Um áttatíu milljónir barna í hættu

Milljónum reglulegra bólusetninga hefur verið frestað vegna kórónuveirufaraldursins og segir Birna Þórarinsdóttir, framkvæmdarstjóri UNICEF á Íslandi, vandamálið mjög alvarlegt.

Síðan í mars hefur regluleg ónæmisþjónusta fyrir börn verið skert í aðgerðum gegn útbreiðslu kórónuveirunnar, en í kjölfarið hafa UNICEF, Alþjóðaheilbrigðismálastofnunin (WHO) og bólusetningarbandalagið Gavi, varað við aukinni áhættu af völdum sjúkdóma á borð við barnaveiki, mislinga og lömunarveiki.

Samkvæmt gögnum frá Alþjóðaheilbrigðismálastofnuninni eru líkur á talsverðri skerðingu á ónæmisþjónustu í sextíu og átta löndum, sem gæti haft áhrif á allt að áttatíu milljónir barna undir eins árs aldri.

„Þannig til að verja fólk fyrir einum sjúkdómi er verið að setja líf milljóna barna í hættu,“ segir Birna í samtali við mbl.is. Hún segir áskorunina fyrir UNICEF vera risastóra, og að hlutverk UNICEF á Íslandi sé fyrst og fremst að safna fé til að senda út svo hægt sé að bregðast við þar sem neyðin er mest.

Frétt af mbl.is

UNICEF á Íslandi í sérflokki

„Núna er allur þungi fjáröflunar UNICEF til að bregðast við kórónuveirunni. Veiran er í raun viðbótarbaggi á alla neyðina sem verið er að bregðast við um allan heim,“ segir Birna.

Hún segir mikilvægt fyrir Íslendinga að læra af reynslunni sem safnast hefur í baráttunni við faraldurinn.  „Við höfum þurft að láta reyna á mikilvægi hreinlætis, mikilvægi aðgengis að sápu og mikilvægi aðgengis að heilsugæslu á eigin skinni,“ segir Birna, en hlutverk UNICEF er að veita slíkt aðgengi á viðkvæmum stöðum í heiminum.

„Ég held að þetta þroski okkur, og geri okkur kleift að skilja betur hvað þessi mál skipta miklu máli.“

• Blogga um frétt