„Tilburðir til þöggunar“

Ráða má, af lestri yfirlýsingar Helgu Bjargar Ragnarsdóttur, skrifstofustjóra borgarstjóra og borgarritara, að hún viðurkenni ekki niðurstöðu Héraðsdóms Reykjavíkur í máli þar sem áminning hennar á hendur fjármálastjóra borgarinnar var felld úr gildi.

Þetta fullyrðir Vigdís Hauksdóttir, borgarfulltrúi Miðflokksins, í yfirlýsingu sem hún birtir á Facebook.

Helga Björg rifjaði fyrr í dag upp dóminn, sem féll fyrir tveimur árum, þar sem dóm­ar­inn fór hörðum orðum um at­hæfi hennar. Benti hún á að „óvæg­in og gild­is­hlaðin orð dómar­ans“ hefðu ítrekað verið dreg­in fram í op­in­berri umræðu, á vett­vangi borgarráðs, borg­ar­stjórnar og á sam­félags­miðlum.

Helga meti því mikils það álit, sem siðaráð Dómarafélags Íslands gaf út í febrúar eftir að hafa fengið erindi frá henni. Túlkar hún álitið sem svo að erindið gefi efni til að brýna fyr­ir dómur­um að gæta virðing­ar og hófsemi gagn­vart öllum ein­stak­ling­um sem að dómsmálum komi með ein­um eða öðrum hætti.

Frétt af mbl.is

„Súrrealísk atburðarás“ eftir dóm héraðsdóms

„Eðlileg leið“ ekki farin

Í færslu sinni segist Vigdís spyrja sig hvers vegna „eðlileg leið var ekki farin innan dómskerfisins og málinu áfrýjað til æðra dómstigs. Þess í stað var dómnum unað og Reykjavíkurborg greiddi bætur auk alls málskostnaðar“.

Vigdís heldur áfram:

„Í öðru lagi má nefna að þrátt fyrir skýra niðurstöðu Héraðsdóms Reykjavíkur í þessu máli þar sem áminning Helgu Bjargar Ragnarsdóttur var dæmd ólögmæt, hélt hún starfi sínu án áminningar en hins vegar var fjármálastjóri ráðhússins færður til í starfi. Eina sem ég gerði var að vitna orðrétt í dómsniðurstöðu Héraðsdóms Reykjavíkur sem allir vita að eru opinber gögn og höfðu þá þegar verið birt í fjölmiðlum og fjallað um þau þar,“ skrifar Vigdís.

Ráðhús Reykjavíkur. mbl.is/​Hari

Ekki lokið af hálfu Vigdísar

„Síðan þá hef ég legið undir ásökunum og persónulegum árásum með þremur hótunarbréfum sem mér voru send í ábyrgðarpósti að kvöldi til á heimili mitt – þar sem mér var hótað að vera dregin fyrir siðanefnd Sambands íslenskra sveitarfélaga fyrir það eitt að hafa vitnað í dóminn,“ skrifar Vigdís.

„Þessi vinnubrögð eru tilburðir til þöggunar og til þess fallin að koma í veg fyrir ríka eftirlitsskyldu kjörinna fulltrúa. Málinu er ekki lokið af minni hálfu enda hef ég ríka lagaskyldu sem kjörinn fulltrúi.“

Frétt af mbl.is

Framkoma Vigdísar henni „til minnkunar“

Færsla Vigdísar er aðeins nýjasti kaflinn í langri deilu þeirra á milli. Helga hefur áður ásakað Vig­dísi um svo gróft einelti að hún hafi hlotið heilsutjón af. Vig­dísi hafa svo borist þrjú ábyrgðarbréf heim þar sem hún er bor­in þess­um sök­um, sem hún seg­ir þó ekki geta verið sann­ar. Hefur hún gripið til þess ráðs að snúa baki í skrif­stofu­stjór­ann þegar þær sitja fundi saman.

• Blogga um frétt