„Þetta er framtíð verslana við Laugaveg. Með þessum gjörningi erum við fyrst og fremst að reyna að ná til almennings. Það þýðir ekki að tala við meirihlutann í Reykjavík,“ segir Gunnar Gunnarsson, talsmaður Miðbæjarfélagsins í Reykjavík, í Morgunblaðinu í dag.
Vísar hann í máli sínu til þess að stór hópur kaupmanna við Laugaveg hefur nú hengt upp svarta ruslapoka í búðargluggum sínum til að mótmæla götulokunum.
Eru pokarnir sagðir tákna það sem að óbreyttu kemur; rekstrarstöðvun. Hátt í 30 verslunarmenn taka þátt í þessum mótmælum í dag.