Hollenska ferðaskrifstofan Voigt Travel, sem flýgur meðal annars til Akureyrar, hefur ákveðið að aflýsa öllum flugferðum sínum í sumar vegna kórónuveirufaraldursins, af því er fram kemur í fréttatilkynningu frá Markaðsstofu Norðurlands.
Þar sem meirihluti Hollendinga hyggst ekki ferðast til annarra landa eða fremur líta til nágrannalanda á þessu ári sé grundvöllur fyrir flugi brostinn.
Ferðaskrifstofan stóð fyrir vikulegum flugferðum með flugfélaginu Transavia milli Rotterdam og Akureyrar síðasta sumar og voru farnar 8 flugferðir frá Amsterdam til Akureyrar á vegum þeirra.
Áform Voigt Travel um flugferðir á næsta ári eru þó óbreytt og er stefnt að 10 flugferðum frá Amsterdam til Akureyrar frá og með 10. febrúar og síðan vikulegu flugi næsta sumar.