Brú í Reykjavík að hruni komin

Eggert Norðdahl, ábúandi á Hólmi við Suðurlandsveg lokaði í dag brú yfir Hólmsá þar sem hún er að hruni komin. Tréstöplar undir brúnni eru fúnir og hefur brotnað úr þeim síðustu ár einkum í vetur. Í dag þótti Eggert nóg komið og lokaði brúnni. Hann hafði samband við verkfræðing frá borginni sem kom á svæðið og tók undir mat hans að brúin væri ónothæf.

Í samtali við mbl.is segir Eggert að nýjar teikningar af brúnni hafi legið fyrir í þrjú ár en einhverra hluta vegna hafi þær ekki komið á framkvæmdaáætlun borgarinnar. Setja þarf upp nýja stöpla báðum megin brúarinnar og endurnýja stálbitana sem liggja undir tréverkinu.

Byggð á þriðja áratug síðustu aldar

Brúin liggur um gamla Suðurlandsveg og var upphaflega byggð á þriðja áratug síðustu aldar en hefur þó verið endurnýjuð síðan. Hún er í dag notuð til að keyra upp að bænum á Hólmi og sumarbústöðum á svæðinu.

Eftir að brúnni var lokað opnaði Eggert á hjáleið, sem hann kallar vetrarleiðina, en hún fer framhjá Rauðhólum. Sú leið er þó ekki beysin og segir Eggert nauðsynlegt að ráðast í viðhald á henni ef hún á að geta sinnt umferð meðan beðið er eftir viðgerðum á brúnni.

Hann segist aðspurður bjartsýnn á að eitthvað verði gert í málunum nú, þrátt fyrir að hafa þurft að bíða svo lengi. Ekki sé um umfangsmikla framkvæmd að ræða þótt hún kunni að kosta nokkrar milljónir.