Sóttvarnastofnun Evrópu hefur uppfært tölur um fjölda nýrra virkra smita kórónuveirunnar hér á landi, í samræmi við breytingar sem almannavarnir gerðu á framsetningu talnanna á covid.is í fyrradag. Nýgengi veirunnar er nú sagt 2,0 í stað 18,8 í gær.

Með nýgengi er átt við fjölda smita sem greinst hafa síðustu 14 daga á hverja 100.000 íbúa. Sóttvarnastofnunin safnar slíkum tölum saman frá öllum Evrópuríkjum, sem nota þau síðan við ákvörðun um sóttvarnaráðstafanir ferðamanna og ferðaráð til eigin íbúa.

Frétt af mbl.is

Smit með mótefnum ekki lengur talin með

Greint var frá því í gær að ein­stak­ling­ar sem grein­ast með kór­ónu­veiruna við kom­una til lands­ins, en reyn­ast síðar hafa myndað mót­efni fyr­ir veirunni og ekki verið með virk smit, hefðu áður verið taldir með í fjölda virkra smita á covid.is en það yrði nú ekki lengur gert. Var það rökstutt með því að sú framsetning væri réttari enda hefðu umræddir aldrei verið með virkt veirusmit á Íslandi.

Fram kom á blaðamannafundi almannavarna í gær að embætti landlæknis hefði farið þess á leit við Sóttvarnastofnunina að hún uppfærði tölur sínar í samræmi við breytingarnar, og hefur það nú verið gert.

Meðan gamla aðferðin var enn við lýði kom Ísland ekki sérstaklega vel út í evrópskum samanburði á stöðu veirunnar. Þannig taldist í gær nýgengi sjúkdómsins sem fyrr segir 18,8 sem skipaði Íslandi í flokk með Bretlandi (14,1) og Spáni (18,0). Eftir breytinguna er Ísland hins vegar í 5. sæti yfir þau lönd þar sem nýgengi er minnst, en deilir að vísu sætinu með Eistlandi.

Tengdar fréttir

Kórónuveiran Covid-19

Í fimm ára fangelsi fyrir að hvetja til hryðjuverka

• Stefna Norðmenn ríkinu vegna bólusetninga?
• 30% með langvarandi áhrif covid
• Mættu hafa í huga þar sem þeir kvarta á Tene
• „Er ég virkilega að deyja?“

» Fleiri tengdar fréttir

• Blogga um frétt