Grímuskylda og aðrar reglur taka gildi
Setja bókamerki
Hertar aðgerðir stjórnvalda, innanlands og á landamærum, vegna COVID-19 hafa formlega tekið gildi og munu standa yfir í tvær vikur, út 13. ágúst næstkomandi. Nú mega að hámarki 100 koma saman og aftur orðið skylda að halda tveggja metra fjarlægð.
Aðgerðirnar voru samþykktar af ríkisstjórn í gær eftir að Þórólfur Guðnason sóttvarnalæknir hafði skilað tillögum um þær til Svandísar Svavarsdóttur heilbrigðisráðherra.
Grímuskylda í fyrsta sinn
Íslendingar þekkja flestar þær reglur sem nú hafa tekið gildi en eina nýjung var að finna í tillögum sóttvarnalæknis sem er skyldan til að bera andlitsgrímu í þeim aðstæðum þar sem ekki er hægt að tryggja tveggja metra fjarlægð milli ótengdra einstaklinga.
Á grímuskyldan til dæmis við í almenningssamgöngum, á hárgreiðslustofum og starfsemi sem krefst nálægðar. Sundlaugum og veitingastöðum er gert að tryggja að tveggja metra bil sé á milli fólks í öllum rýmum með fjöldatakmörkunum í samræmi við stærð hvers rýmis.
Þá er það lagt til að starfsemi „sem í eðli sínu felur í sér að gestir noti sameiginlegan búnað“ geri hlé eða sótthreinsi búnaðinn milli notenda. Þetta á til dæmis við um líkamsræktarstöðvar og spilasali.
Efldar aðgerðir á landamærum
Þá hefur einnig verið hert á reglum um komur til landsins en héðan í frá fara allir sem koma hingað frá áhættusvæðum og ætla að dvelja hér á landi í tíu daga eða lengur í tvöfalda sýnatöku. Þá fyrstu við komuna til landsins og hina síðari á degi 4 til 6 – ef fyrra sýnið er neikvætt.
Þá hefur því verið haldið opnu að mögulega þurfi að herða ofangreindar ráðstafanir enn frekar ef þær bera ekki árangur.
„Höfum sloppið bærilega með skaða af þessu gosi“
Hótar Bretum og Bandaríkjamönnum
Viðræður ekkert þokast frá því á þriðjudag
Hópur fólks reyndi að komast að eldgosinu
Drónamyndskeið frá hápunkti gossins í nótt
Fullvissa ferðamenn um að hér sé öruggt