„Mikilvægt að vera á tánum“

Benedikt G. Ófeigsson, sérfræðingur á Veðurstofu Íslands, segir mikilvægt að vera á tánum gagnvart vísbendingum um að hlaup sé hafið undan Grímsvötnum. 

Sérfræðingar Veðurstofunnar, ásamt sérfræðingum almannavarna, fóru í leiðangur í Grímsvötn með þyrlu Landhelgisgæslunnar á sunnudag. 

Um helgina var útlit fyrir að hlaup væri líklega að hefjast í Grímsvötnum, en við nánari athugun kom í kjós að snjór í kringum staur sem tengdur er GPS-mæli á fjallinu var farinn að bráðna, en við það hallaði staurinn og benti það til þess að hlaup væri að hefjast undan Grímsvötnum. 

Frétt af mbl.is

Hallandi staur hleypti öllu af stað

„Það voru óvenju mikil hlýindi á jöklinum á fimmtudag og föstudag þannig mögulegt var að mælitækin hefðu færst úr stað vegna bráðnunar. Það kom svo í ljós þegar sérfræðingar Veðurstofunnar lentu á jöklinum að staurinn var tekinn að halla verulega vegna bráðnunar. Það varð til þess að hann gaf frá sér falskt merki um að hlaup væri hafið,“ segir í færslu Veðurstofunnar um leiðangurinn, en markmiðið með honum var að kanna ástand mælitækjanna á jöklinum. 

Benedikt, sem var einn af leiðangursmönnum Veðurstofunnar, segir í færslunni að mikilvægt sé „að halda þvi til haga að við eigum von á hlaupi úr Grímsvötnum og því er mikilvægt að vera á tánum gagnvart vísbendingum um að hlaup sé hafið,“ en Benedikt segir jafnframt að við vöktun á náttúru Íslands sé það viðbúið að mælitæki geta gefið „fölsk merki“.

• Blogga um frétt