Tekið mið af samningi við Reykjavíkurborg

Samninganefndir Eflingar og Samtaka sjálfstæðra skóla (SSSK) funduðu hjá Ríkissáttasemjara í dag. Þetta kemur fram í tilkynningu frá Eflingu.

Lagðar voru fram tillögur til lausnar á kjaradeilu félagana, en þann 15. maí lagði Efling fram drög að fullbúnum samningi sem fól í sér vísun í núgildandi samning Eflingar við Reykjavíkurborg.

Í tilkynningunni segir að fyrir liggi að festa í kjarasamningi núverandi kjör starfsfólks á einkareknum leik- og grunnskólum, og hafi þau „árum saman tekið mið af samningum Eflingar við Reykjavíkurborg.“ Efling hafi ekki gert neinar kröfur umfram samninginn við Reykjavíkurborg.

Sólveig Anna Jónsdóttir formaður Eflingar. mbl.is/Eggert Jóhannesson

Síðasti samningafundur var haldinn 25. júní síðastliðinn, en þar hafi SSSK lagt fram athugasemdir sem ræddar voru á fundinum í dag. Boðað hefur verið til annars fundar 2. september næstkomandi samkvæmt ákvörðun Ríkissáttasemjara.

„Málið er í eðli sínu afar einfalt: það þarf að staðfesta í gildum samningi að kjör Eflingarfólks hjá sjálfstæðum skólum séu þau sömu og hjá Reykjavíkurborg. Við trúum ekki öðru en að á næsta samningafundi komumst við langleiðina að samkomulagi,“ er haft eftir Sólveigu Önnu Jónsdóttur, formanni Eflingar, í tilkynningunni.

• 1 blogg um fréttina

Bloggað um fréttina

• Sigurbjörn Sveinsson: Athugasemdir eru "ávarpaðar"