Dreginn til hinstu hvílu í Sundahöfn

Eftir langa veru í höfninni var 30 tonna trébáturinn Jón forseti í gær loks leiddur til hinstu hvílu í Sundahöfn í Reykjavík.

Ekki er óalgengt að bátar sem lengi hafa legið í höfninni séu dregnir og rifnir þegar lítið annað stendur til boða, að sögn talsmanns hafnsögumannsins í Reykjavík.

Dýrt er að reka trébát og hefur bátum smíðuðum af íslenskum skipasmiðum, úr furu og eik, farið fækkandi á undanförnum árum.

Í gær var fremur þungt yfir Sundahöfninni og höfuðborgarsvæðinu öllu, skýjað og rigning, sem einnig má búast við í kvöld. Haustið er að ganga í garð og á sunnudag lítur út fyrir að lægð muni leggjast yfir landið með auknum vindi og rigningu en búist er við rigningu sunnan og vestan til, með hitanum 10 til 18 stig. Yfir heildina litið er útlit fyrir rólegheitaveður næstu daga.