Veiddi koi-fisk í Elliðaám

Japanskur koi-fiskur var veiddur upp úr Elliðaám fyrir helgi.

Það var Þorkell Heiðarsson, líffræðingur og deildarstjóri í Húsdýragarðinum, sem veiddi hann með háfi eftir að sonur hans hafði komið auga á torkennilegan fisk ofan við Árbæjarstíflu þegar hann var þar á skokki.

Þorkell hafði samband við Jóhannes Sturlaugsson, vin sinn og fyrrverandi samstarfsfélaga sem rekur Laxfiska ehf. sem halda utan um rannsóknir í ánni. Úr varð að Þorkell skellti sér í vöðlur, greip með sér háf og hélt til veiða.

Auðveld veiði

„Þetta var frekar lítið mál,“ segir hann og bætir við að auðvelt hafi verið að komast að fisknum sem var í lítilli sprænu á milli kvísla í ánni. „Hann var ekki mjög hress. Hann var ekki að sprikla mikið eða fara hratt á milli. Þetta var ekki erfiðasta fiskveiðin,“ segir Þorkell, spurður út í þessa óvenjulegu veiðiferð. Fiskurinn, sem er skrautafbrigði vatnakarpa, var um 40 sentimetra langur og vó ríflega 1.000 grömm.

Fiskurinn áður en Þorkell veiddi hann. Ljósmynd/Aðsend

Hann nefnir að annar koi-fiskur hafi verið veiddur talsvert neðar í ánni í vor og telur að þessum fisk hafi verið sleppt ofarlega í ánni og borist niður eftir henni. „Það er ekkert voðlega sniðugt að sleppa þessum fiskum í íslenskar laxveiðiár. Það er hægt að gera margt gáfulegra,“ segir hann og bætir við að tegundin eigi ágætismöguleika á að lifa af við íslenskar aðstæður. Hún geti fjölgað sér og borið með sér sníkjudýr eða sjúkdóma. „Við verðum að passa okkur að fara vel með árnar okkar.“

Fiskurinn er núna í Húsdýragarðinum en Þorkell efast um að hann verði þar til frambúðar. Líklega verður honum komið í fóstur þar sem hann getur verið í tjörn.

• Blogga um frétt