Innflytjendur 15,2% íbúa landsins

55.354 innflytjendur voru búsettir á Íslandi um síðustu áramót eða 15,2% mannfjöldans. Það er fjölgun frá því í fyrra þegar þeir voru 14,1% landsmanna (50.271). Fjölgun innflytjenda heldur því áfram en frá árinu 2012 hefur þeim fjölgað úr því að vera 8% mannfjöldans upp í 15,2%.

Innflytjendum af annarri kynslóð fjölgaði einnig á milli ára, þeir voru 5.264 í fyrra en eru nú 5.684. Samanlagt er fyrsta og önnur kynslóð innflytjenda 16,8% af mannfjöldanum og hefur það hlutfall aldrei verið hærra. Einstaklingum með erlendan bakgrunn, öðrum en innflytjendum, fjölgaði einnig lítillega á milli ára og eru nú 7% mannfjöldans.

Á Suðurnesjum eru innflytjendur 28% íbúa

1. janúar bjuggu 39.115 fyrstu og annarrar kynslóðar innflytjendur á höfuðborgarsvæðinu eða 64,1% allra innflytjenda á landinu. Hlutfall innflytjenda af mannfjölda var mest á Suðurnesjum en þar voru 27,9% innflytjendur af fyrstu eða annarri kynslóð. Næsthæst er hlutfallið á Vestfjörðum þar sem 19,9% mannfjöldans voru innflytjendur og börn þeirra. Lægst er hlutfallið á Norðurlandi vestra en þar voru 9,1% mannfjöldans innflytjendur og börn þeirra.

Innflytjandi er einstaklingur sem er fæddur erlendis og á foreldra, báða afa og ömmur, sem öll eru fædd erlendis. Innflytjendur af annarri kynslóð eru einstaklingar sem fæddir eru á Íslandi og eiga foreldra sem báðir eru innflytjendur. Fólk er talið hafa erlendan bakgrunn ef annað foreldrið er erlent. Einstaklingur sem fæddist erlendis en á foreldra sem báðir eru fæddir hér á landi telst einnig hafa erlendan bakgrunn, segir í skilgreiningu Hagstofu Íslands.

Pólverjar fjölmennastir innflytjenda

Eins og síðustu ár eru Pólverjar langfjölmennasti hópur innflytjenda hér á landi. Um áramót voru 20.477 einstaklingar frá Póllandi eða 37% allra innflytjenda. Þar á eftir koma einstaklingar frá Litháen (5,9%) og Filippseyjum (3,8%). Pólskir karlar eru 39,3% allra karlkyns innflytjenda eða 12.121 af 30.866. Litháískir karlar eru næstfjölmennastir (6,7%) og síðan karlar með uppruna frá Rúmeníu (4,4%). Pólskar konur eru 34,1% kvenkyns innflytjenda, næst á eftir þeim eru konur frá Filippseyjum (5,8%) og þá konur frá Litháen (5%).

Í fyrra fengu 437 einstaklingar íslenskan ríkisborgararétt og er það nokkur fækkun frá fyrra ári þegar 569 einstaklingar fengu íslenskt ríkisfang. Af þeim 437 einstaklingum sem fengu íslenskt ríkisfang höfðu langflestir áður verið með pólskt ríkisfang, eða 131, og næstflestir verið með ríkisfang frá Víetnam (30). Árið 1991 fengu fleiri karlar en konur íslenskt ríkisfang en á hverju ári eftir það hafa konur verið í meirihluta nýrra íslenskra ríkisborgara. Það átti einnig við í fyrra þegar 260 konur fengu íslenskan ríkisborgararétt en 177 karlar.

468 fengu alþjóðlega vernd – flestir frá Venesúela

Á árinu 2019 fengu 468 einstaklingar alþjóðlega vernd. Aldrei hafa áður jafn margir fengið slíka vernd á sama árinu, en árið 2018 voru þeir 247. Flestir (155) höfðu venesúelskan ríkisborgararétt en þar á eftir komu flóttamenn með sýrlenskt ríkisfang (71). Nýjum umsækjendum á árinu fjölgaði lítillega frá árinu 2018. Þeir voru 813 árið 2019 samanborið við 731 árið 2018. Alls voru gefin út 2.105 ný dvalarleyfi til einstaklinga utan EES-svæðisins á árinu 2019 samanborið við 1.952 árið 2018.

• Blogga um frétt