Ólöf endurráðin til fimm ára

Ólöf Kristín Sigurðardóttir hefur verið endurráðin til fimm ára sem forstöðumaður Listasafns Reykjavíkur.

„Undir hennar stjórn hefur tekist að styrkja hlutverk Listasafns Reykjavíkur sem öflugan og breiðan vettvang lista,“ segir Arna Schram, sviðsstjóri  menningar- og ferðamálasviðs, í rökstuðningi fyrir endurráðningu Ólafar, að því er kemur fram í tilkynningu.

Ólöf hafi á undanförnum árum byggt upp öflugt teymi starfsmanna og saman hafi þau óhikað farið nýjar og ótroðnar slóðir. Undir hennar stjórn hafi hvert aðsóknarmetið af öðru verið slegið og hún hafi sérstaklega lagt sig fram um að sinna nærsamfélaginu og höfða til íslenskra gesta.

Ólöf Kristín hóf störf haustið 2015 og var þá valin úr hópi níu umsækjenda. Að fimm árum loknum er sviðsstjóra menningar- og ferðamálasviðs heimilt að framlengja ráðningu safnstjóra einu sinni til næstu fimm ára að höfðu samráði við menningar-, íþrótta- og tómstundaráð.

Ráðið lét bóka á fundi sínum þann 14. september að það fagnaði endurráðningu Ólafar Kristínar enda hefði hún átt ákaflega farsælan feril.

• Blogga um frétt