Rækta litskrúðugt kál á Flúðum

Garðyrkjubændurnir á Melum á Flúðum leggja sig eftir ræktun á káli í ýmsum litaafbrigðum. Þar á meðal er appelsínugult og fjólublátt blómkál, rautt grænkál og fjólublátt spergilkál. Þá rækta þau toppkál sem er afbrigði af hvítkáli en öðruvísi að lögun, eins og heitið gefur til kynna.

„Ég geri þetta mikið fyrir búðina. Við seljum þetta þar en það sem er umfram það fer í bæinn, í sérverslanir geri ég ráð fyrir,“ segir Guðjón Birgisson á Melum.

Í umfjöllun um ræktunina í Morgunblaðinu í dag segir hann að yfirleitt sé svipað bragð af litskrúðuga kálinu og grænum systkinum þess. Þó séu sumar tegundir bragðsterkari vegna þess að þær hafi haft lengri tíma til að vaxa.