SA fresta atkvæðagreiðslu eftir fund með stjórnvöldum
Setja bókamerki
Forysta Samtaka atvinnulífsins fundaði í morgun með forsvarsmönnum ríkisstjórnarinnar í ráðherrabústaðnum við Tjarnargötu. Fundarefnið er sú staða sem upp er komin á milli aðila vinnumarkaðarins. Í kjölfarið ákváðu samtökin að fresta fyrirhugaðri atkvæðagreiðslu félagsmanna SA sem átti að hefjast á hádegi í dag um hvort segja ætti lífskjarasamningnum upp. Hefst atkvæðagreiðslan í staðinn á hádegi á morgun. Þetta staðfestir Halldór Benjamín Þorbergsson, framkvæmdastjóri SA, í samtali við mbl.is.
Niðurstaða atkvæðagreiðslunnar á eftir sem áður að liggja fyrir á miðvikudaginn, líkt og upphaflega var áætlað.
Spurður hvort ákvörðunin hafi verið tekin eftir þrýsting frá stjórnvöldum segir Halldór að um einhliða ákvörðun SA sé að ræða. „Við teljum ástæðu til að bíða með atkvæðagreiðsluna þangað til á morgun, enda teljum við að samtalið þurfi að halda áfram og ég útiloka ekki að hitta stjórnvöld aftur í dag.“
Halldór segist hins vegar ekki gera ráð fyrir að hitta fulltrúa ASÍ í dag. Spurður nánar út í viðræðurnar á milli SA og stjórnvalda segir Halldór aðila á sama máli um grunnatriðin. „Ríkisstjórnin og Samtök atvinnulífsins eru sammála um að það þarf að bregðast við þeirri stöðu sem upp er komin með einhverjum hætti. Samtalið aðila á milli hefur miðað að því að móta eitthvert viðbragð. Ég fagna því að það samtal eigi sér stað.“
Halldór vildi að öðru leyti ekki gefa neitt upp um það samtal sem átti sér stað á fundinum í morgun.
Þegar atkvæðagreiðsla félagsmanna SA liggur fyrir er það svo framkvæmdastjórnar samtakanna að taka lokaákvörðun um hvort slíta eigi lífskjarasamningnum, en það er framkvæmdastjórnin sem hefur samningsumboðið.
Fundaði með starfsfólki í fjóra tíma í gær
Leiðindaveður yfir jólahátíðina
„Á allt sitt undir því að njóta trausts almennings“
Óveður heldur Holtavörðuheiði lokaðri
Feðgar saman í Grænlandstúr á jólum
Strandveiðar „efnahagsleg sóun“
Ofmeta sparnað í stjórnarráðinu