Sjálfbær þróun leiðarljós í orkustefnu til 2050

Ný langtíma orkustefna Íslands til ársins 2050 var kynnt af Þórdísi Kolbrúnu Reykfjörð Gylfadóttur, ferðamála-, iðnaðar- og nýsköpunarráðherra í dag. Yfirskrift orkustefnunnar er „Orkustefna til ársins 2050: Sjálfbær orkuframtíð“ og segir ráðherra að með þessu sé gætt hagsmuna núverandi og komandi kynslóða.

Stefnan var unnin af fulltrúum frá öllum flokkum á Alþingi, fjórum fulltrúum ráðuneyta og í samráði við hagsmunaaðila.

Sett eru fram 12 meginmarkmið í orkustefnunni og eru þau eftirfarandi:

• Orkuþörf samfélags er ávallt uppfyllt
• Innviðir eru traustir og áfallaþolnir
• Orkukerfið er fjölbreyttara
• Ísland er óháð jarðefnaeldsneyti; orkuskipti eru á landi, á hafi og í lofti
• Orkunýtni er bætt og sóun lágmörkuð
• Auðlindastraumar eru fjölnýttir
• Gætt er að náttúruvernd við orkunýtingu
• Umhverfisáhrif eru lágmörkuð
• Nýting orkuauðlinda er sjálfbær
• Þjóðin nýtur ávinnings af orkuauðlindunum
• Orkumarkaður er virkur og samkeppnishæfur
• Jafnt aðgengi að orku er um allt landið

„Þegar við skoðum meginmarkmiðin tólf sjáum við að við eigum mörg óunnin verkefni. Þar liggja gríðarleg sóknarfæri,“ er haft eftir Þórdísi í tilkynningu frá ráðuneytinu, en hún segir næstu skref vera að setja fram árangursvísa og aðgerðir sem byggja á markmiðum stefnunnar.

Stefnt er að sjálfbærri orkuframtíð í orkustefnu fyrir Ísland til 2050.

Í starfshópnum sátu:

• Guðrún Arnbjörg Sævarsdóttir, formaður, skipuð af ráðherra
• Páll Jensson, varaformaður, skipaður af ráðherra
• Halla Signý Kristjánsdóttir, tilnefnd af þingflokki Framsóknarflokksins
• Albertína F. Elíasdóttir, tilnefnd af þingflokki Samfylkingarinnar
• Árni V. Friðriksson, tilnefndur af þingflokki Miðflokksins
• Kristín Vala Ragnarsdóttir, tilnefnd af þingflokki Pírata
• Kolbeinn Óttarsson Proppé, tilnefndur af þingflokki Vinstri hreyfingarinnar - græns framboðs
• Njáll Trausti Friðbertsson, tilnefndur af þingflokki Sjálfstæðisflokksins
• Þorsteinn Víglundsson, tilnefndur af þingflokki Viðreisnar
• Ólafur Ísleifsson, tilnefndur af Flokki fólksins (Guðmundur Borgþórsson var tilnefndur í hans stað en starfaði ekki með hópnum)
• Magnús Júlíusson, tilnefndur af fjármála- og efnahagsráðuneytinu
• Harpa Þórunn Pétursdóttir, tilnefnd af atvinnuvega- og nýsköpunarráðuneytinu
• Brynhildur Davíðsdóttir, tilnefnd af umhverfis- og auðlindaráðuneytinu
• Ólafur Kr. Hjörleifsson, tilnefndur af samgöngu- og sveitarstjórnarráðuneytinu

Erla Sigríður Gestsdóttir, starfsmaður starfshópsins, var tilnefnd af atvinnuvega- og nýsköpunarráðuneytinu. Kristinn Hjálmarsson ráðgjafi starfaði einnig með hópnum.

• Blogga um frétt